verslag uitwaaiwedstrijd

terug naar overzicht

Zondag, 21 december 2014

door Stoffer Tolk, Man ,man ,man watn boudel vandoage bie onze oetwaaiwedstried!

Dr was roeg weer veurspeld , nou dat kregen wie ook, mor aal mit aal waren dr toch weer 13 viskeluu dei mit deden aan onze joarliekse oetwaaiwedstried. In het engels haiten ze “diehards “ mor in t Grunnens nuimen wie ze roegbainders!
Wie hebben gevist in de Scheemder hoaven. Dr was veur elk en aine n stee mor elk kon nait mit de wind in de rogge vissen. Er kwam ook nog ain verain noa ons dei wel aanvroagd haar mor dat nait goudkeurd was en dei mozzen dus mit de kop in de wind zitten.
Bie ons vloog dr soms meer in het wotter dan dat dr oet kwam. Er vloog van alles in het wotter ik zol joe het loaten waiten; brillenkokers ,vouerbakjes ,thermoskannen ,hengelstokken ,vistassen zelfs een komplete viskanis mit vouerplato, mor heul veul dingen konden weer opgevist worden (wie binnen toch viskeluu oeteindelijk.)
Veul haarde wind dus mor het bleef tot het leste tou dreuge! Tussendeur haarn wie pauze en in dei pauze waren de worstjes warm en de Mummelman kold. Dr was aine dei nait van zie stee oaf duurde, hai kreeg zien stoetje aanlangt van Jan Bluhm (onze sponsor).
Dizze man was dus ook winnoar van de BB (Bosje Bloumen volgens de laiding, wie woitn wel beter...)
Noa oafloop binnen wie nog even bie mekoar west in ons viscafe Reumerman, wie waren allemoal zo rozig as ain zwien.
Wie waren het ains mitmekoar dat het dit joar wat betreft de vangsten en het weer gain succes was, mor wie binnen de leste poar joar misschain ook wel ain beetje verwend west.
Op de vroag wat doun wie ankommende joar ,kregen wie as antwoord : DEURGOAN!
Ook dit joar was Jan Bluhm weer onze sponsor .Het applaus noa oafloop was welgemaind!, dus wat betreft ankommende joar mit dizze viskeluu goan wie dr weer veur!!

Want den komt weer de oproup : Het zol weer weezn !!

Stoffer Tolk

Hier de ingezonden foto van Tonnie van 't "boske bloumen..."


Om u de beste gebruikservaring te kunnen bieden, gebruiken wij cookies. Voor meer inhoudelijke informatie en het onderscheid die wij hier in maken, verwijzen wij u door naar ons Cookie beleid

Accepteer cookies